تنبيه لدخول الموقع مره اخرى عن طريق جوجل اكتب ( الحنين محمد حسن )

شعر عن الشيطان شعر مصرى


اهلا يا ابن آدم انا مين



انا اللى جى اسعدك ..وبكل خير اوعدك
عن اى ملل ابعدك..وحدك هتقول انا مين

انا عايزك رايق ومحشش..مش شاغل بالك ومطنش
انا عايزك كده شاب مروش..انا عايزك فى الباى باى

انا عايزك طب وانا مالى..ما انا عايش كده وفى حالى
ليه انا هشغل بالى..مين رايح مين بقى جاى

انا عايزك ديما خايف..ومفتح لكن مش شايف
تعرف وتقول مش عارف..ومتسالنيش ازاى

انا عايزك سينما ونادى..لو وقت الصلاه بينادى
تعمل مشغول مش فاضى..وتقول الوقت الجاى

انا عايزك شاب مطأطأ..واد عسولة مدءدء
على كل حرام بيبحلق..هاللو يا مدام او هاى

متخافش وعيش اللحظه..مين من الناس دى ملحظة
ده العمر ايه غير لحظة...عشها بقى انا باى

متخافش هكون وياك..ده انا كل حياتى فداك
وانا عايش غير لرضاك..عرفت بقى انا مين




اهلا با بنت حوا

ركزى معايا بالظبط..انا جى رسملك خط
ولازم تمشى عليه

انا عايزك حلوة وعايشه..بنت جميله وروشه
لا سمح الله مش طايشه..بصى هقولك ايه

انا عايزك احلى اصحابك..ده مش وقت حجابك
لسه فى عز شبابك..والعمر ده بدرى عليه

انا عايزك عايشه بحرية..انا عايزك بنت الالفيه
سيبك من الناس الرجعيه..دى مش عارفه بتقول ايه

ولجوزك اه او لئه..وتقولى ده حق المرأه
مش عاجبك خلعه ومش فرقه..ده الحق بايدك مش بايديه

انا عايزك لو وقت فريضه..اعملى تعبانه ومريضه
الاوقات دى طويله عريضه...واليوم لسه بدرى عليه

كلامى ليكو يا اشخاص..انا خلصته كله خلاص
للعام ليكم ويا الخاص..بكره اشوفك يا اسمك ايه

هناك 10 تعليقات:

  1. الصراحة يامحمد كلامك حكم الله يحفظك. فياشباب لاو يا بنات استفيدوا من ده الكلام ده الشيطان وراكم لحد ما تقعوا بالخطاء استغفروا الله في الايام المختارة دي. ومقدرش اقول لك يامحمد غير الله يخليك ويحرسك قول اميييييييييييين

    ردحذف
  2. محمد
    جميل اوي البوست دا
    وربنا يحمينا ويعافينا من ابليس اللي كل همه
    انه يرخصنا ويمشينا في الوهم والغلط
    تحياتي ليك وكل سنه وانت طيب وربنا يحميك

    ردحذف
  3. فعلا يا محمد
    هو دا كلامه
    هي دي نصايحه
    كل اللي يقدر عليه
    انه ياخد ايدينا للخطأ
    ويقول ركزوا عليه

    بجد انت عبقري
    دام قلمك يخط جمالا

    ردحذف
  4. والله انا مش عارفه اقول ايه
    انت تحفه من زمان بعيد من التحف النادره والله يا ميدو انت عسل وكلامك عسل

    ردحذف
  5. هذا هو الشيطان بيعمل صاحبك وحبيبك
    الله يبعده عنك وعنا يارب
    كلامك جمييييييييييييل

    خالص تحياتى

    ردحذف
  6. والله صح كل الكلام ده بينقال يارب ربنا يبعده عنا وعن المسلمين جميعا لا بس مفاجاه دى يا فنان ماشاء الله ربنا يوفقك .....احمد

    ردحذف
  7. هي ديه صفاته يحلي اي شئ في نظرك ويحسسك انك عمرك ما بتعمل حاجه غلط اعوذ بالله من الشيطان الرجيم

    ردحذف
  8. أخى فى الله محمد

    كل سنة و إنت طيب و بخير و سعادة

    ربنا يبعد عنا الشياطين يا رب .. و يقدرنا على فعل كل عمل يقربنا به إلهدى و التقوى و الإيمان .... لوجه الله تعالى

    خالص تقديرى
    دمت بخير

    ردحذف
  9. راجي رضا الله24 أغسطس، 2010 7:08 م

    ماشا الله جميلة جميلة جميلة
    فعلا الشيطان بيزن لينا الحاجات اللي مش كويسة وكأن سعادتنا فيها
    وسبحان الله في الاخر الشيطان هخطب خطبة للي سمعو كلامه الخطبة دي في سورة ابراهيم
    بسم الله الرحمن الرحيم
    (وقال الشيطان لما قضي الأمر إن الله وعدكم وعد الحق ووعدتكم فأخلفتكم وما كان لي عليكم من سلطان الا ان دعوتكم فاستجبتم لي فلا تلوموني ولوموا انفسكم)

    سحان الله هو اللي في الاخر هيقوللنا وماكان لي عليكم من سلطان يعني انا ما ضربتش حد علي ايده انا بس زينتلكم الحرام


    وانت يا محمد ماشاء الله قصيدتك بتجسد المعني ده
    معني التزيين اللي الشيطان بيعمله
    ربنا يبارك فيك
    (راجي رضا الله )

    ردحذف
  10. اوا الله يهدى ابليس باش ما يبقاش يوسوس لناس

    ردحذف