تنبيه لدخول الموقع مره اخرى عن طريق جوجل اكتب ( الحنين محمد حسن )

الوطن المر



هحكى اليوم عن حال البلد..اللى لا شيخ ولا بنت وولد
من جواه راضى عن حالها..اصل الكل منها اتجلد

لالالا مش قصدى الكل..ما هو فيه ناس عايشه مية فل
ناس عايشه بتتحكم فينا..عايزه نكون فى عذاب وفى ذل

هحكى عن بلدى المحبوبه..الل ليل ونهار منهوبه
اصل حاميها فيها حراميها..والاحوال فيها مقلوبه

النهارده انا هحكى هقول..وكلام عنه انا المسؤول
فجر الحق هتيجى تنادى..مهما ان ليل الظلم يطول

انا مش لاقى الوطن الحر..انا مش لاقى غير المر
شايف ناس عايشه وشقيانه..فى كل لحظة دقيقه تمر

انا مش لاقى ولا انجاز..ولا نهضه ولا شىء اعجاز
انا مش شايف غير ازمات..ميه ونور وكمان الغاز

انا مش عارف اوصف حالنا..اصل حالنا فوق احتمالنا
ياما سمعنا ياما وعود..ايه منها اتحقق او جالنا

يا حكومة فين التدبير..وبلاش تانى نقول تغيير
شايف مية مليون حاجه..ابسط حاجه العيش طوابير

انا مش شايف غير انه ساد..فى بلدنا ظلم وفساد
احنا فى وادى وهم فى وادى...والاسوأ عمال يزداد

بص وقوللى فين العداله..هات لى ولو ربع دلاله
لسه فيه يا مصر فيكى..ناس بتاكل م الزباله

بص بعينك شوف هتلاقى..ايه حوليك غير شىء عشوائى
ناس فى مقابر ساكنه وعايشه..ايه تانى فاضل او باقى

واللى عندى خلاص اتقال...وكأنه فعلا ما اتقال
قالى هتسكت او تتكلم..برضوا هجبلك بكره جمال

هناك 14 تعليقًا:

  1. وقفت حائره بين سطورك
    وما تحمله من جمال
    فأنت صاحب الفن
    والسحر يملأ كلماتك

    ردحذف
  2. محمد
    خلص الكلام بجد
    انت بجد شاعر وفنان عبقري
    يا سلام علي احساسك العالي
    بجد وصفت الوطن في قصيده من اجمل القصائد
    سلمت يداك
    فعلا وطنا بقي المر فيه اكتر بكتير من الحلو

    واختيارك للصوره هايل
    بجد وصفت حال الشعب المصري

    دمت بارع ومتألق ومبدع كالعاده

    ردحذف
  3. انا لفيت فى المدونة لفة سريعة كده وعجبنى فيها اكتر من بوست

    ردحذف
  4. ماشاء الله انا كل يوم اعجابي بيزيد بيك اكتر وأكتر مع انك ما نشرتش بعض التعليقات اللي كتيتها لكن خير
    يكفيني ان انت قرأتها
    شعرك الاخير ده ماشاء الله ممتاز جدا
    واكتر حاجة مميزاه انه واقعي
    ووللاسف احنا عندنا سلبية كبيرة قوي وبنخاف جدا
    انا شفت موضوع التوقيعات اللي انت طرحته علي المدونة
    ناس كتير قالو احنا بنحب شعرك وكل حاجة لكن مالناش دعوة بالتوقيعات
    حسيت ان احنا كبيرنا ان احنا نزعل علي حالنا لكن وقت الجد كلله بيقول يعني هي جات عليا
    علي العموم ربنا يبارك فيك انت بتعمل اللي عليك حتي لو بالشعر
    ربنا يجزيك كل خير
    راجي رضا الله

    ردحذف
  5. السلام عليكم يامحمد
    ازيك؟ طمنا عليك؟
    صح اني مش مصريه
    بس في حاجات بتحصل عندكم بتحصل بالبلدان التانية
    هو كده حال العرب بيوعدوا وبيخلفوا
    بس كلامك بمحله والله يوفقك
    وانت بتكبر بعنينا كل يوم
    وده اقل كلام اقدر اقوله ليك.
    طمنا عليييييييييييييييييييييييييييك؟
    ياشاعر العصر

    ردحذف
  6. معاك حق فى كل كلمة قولتها
    قدرت توصف حال الشعب المصرى
    والمأسى اللى طالتنا
    ربنا يبارك فيك

    كل سنه وحضرتك طيب
    رمضان كريم

    ردحذف
  7. بجد مش هاقول غير ماشاء الله عليك الله اكبر عليك
    انت بجد ليك احساس رائع وجميل بتطلعه باجمل موسيقي ماشاء الله عليك

    ردحذف
  8. كلمات جميلة

    كل سنة و إنت طيب و بصحة و سعادة

    دمت بخير

    ردحذف
  9. كلام جميل
    الوجع كبير
    قدرت توصف حال بلد فى كلام بسيط
    الله عليك تسلم ايدك

    ردحذف
  10. يا محمد انا مش عارفه اقول ايه بس اللى اقدر اقوله انى انت انسان نادر فى هذا الزمان وعندك حق ربنا يستر من اللى جى

    ردحذف
  11. يا محمد بلد فيها الظلم كتير اوى ربنا يستر علينا وعليك فيها الاخ بيبيع اخوه يبقى الغريب يعمل ايه ربنا يستر علينا
    وعليك

    ردحذف
  12. لله الامر من قبل ومن بعد لك الله ياشعب مصر ولكم الله ايها الصابرون
    لكن ان بعد العسر يسر قادر ربنا يخلصنا من العصابة دي
    تحياتي

    ردحذف
  13. السلام عليكم
    ايه مفيش جديد
    طولت علينا المرة دي؟
    دنا مستنية على احر من الجمر قصيده لشاعر العصر .
    سلامي

    ردحذف
  14. كلماتك مؤثرة جدا
    ياريت الحكومة الجديده تعمل حاجة للبلد

    ردحذف